discovery bags

حزر فزر!!!

فكره اللعبه سهله بس مسليه وممكن تتعاد اكتر من مره,,الفكره انك تجمعي شويه لعب وأدوات موجوده في البيت (بس بلاش سكاكين أو سواطير) وتحطي الحاجات دي في أي شنطه أو علبه من غير ما الطفل مايشوف انتي بتعملي إبه....وتشرحيله انك حتغطي عينه عشان مايشوفش اللي جوه الشنطه,,بس المفروض انه يعرف ايه الحاجه اللي هو ماسكها عن طريق حاسه اللمس

أحمد عجبته اللعبه وعرف معظم الحاجه بس كان مخنوق شويه في الأول عشان عينه متغطيه  وبعد كده اتعود وخلاني أنا أغطي عيني وألعب,,وأخد الكاميرا وصورني زي ماكنت بصوره

ميزه اللعبه إنها بتنمي حاسه اللمس وبتنمي الخيال,,والميزه كمان بعد مالعبنا إني بدأت أفهمه إن في ناس فاقده البصر ومابتقدرش تشوف على طول وعشان كده لازم نساعدهم ونحمد ربنا إننا عندنا عنين بنشوف بيها,,طبعا هو مافهمش حاجه وكان بيبصلي ببلاهه!!.....فغطيت عيني تاني ومثلت إني مش شايفه حاجه ومش عارفه أكل لأني مش شايفه الطبق ,,ومش عارفه أمشي لوحدي لأني محتاجه حد يساعدني..فبدأ يمسك ايدي ويساعدني في المشي ,,وبعدين عكسنا الحاله وبقى هو اللي مغطي عينه وأنا اللي بساعده عشان يمشي☺

ماقدرش أقول إن الفكره وصلته بنسبه 100% بس أكيد بدأ يستوعب ولو شويه إن في ناس تانيه مش بتقدر تشوف وإننا لازم نساعدهم لو نقدر♥

والفكره موجوده في اللينك ده

http://kidsactivitiesblog.com/sense-of-touch-discovery-bags/

(cheating)

رووتين مش ممل

دائره الإرتياح

أعتقد إن أغلبنا بيعاني من مشكله انه بيبقى عايز يعمل مليوون حاجه في اليوم بس مش بيعرف ينتظم لفتره طويله..كام واحد نفسه يواظب على القراءه كل يوم او لعب الرياضه أو حفظ القرآن أو حتى إنه ياخد حبايه فيتامين أو دوا مهم....ومع اننا بنكون عارفين أهميه الحاجه دي بس بنفتكر أول يومين وبعد كده بخخخخخ

وغالبا لما بتاخدنا الحماسه ونقوم نقف وقفه رجاله ونقرر اننا لازم نغير حياتنا المبعزقه دي,, بنقرر اننا نعمل كل الحاجات اللي نفسنا ننجزها مره واحده... واللي بيحبوا يعملوا جداول زيي كده بيتنطروا يجيبوا أكبر كراسه عندهم ويقوموا يكتبوا جدول دقيق ومفصل لكل الانجازات اللي لازم يحققوها في كل دقيقه وثانيه وفيمتو ثانيه لدرجه انه مابيكونش حتى في وقت للنوم في الجدول ده.... وطبعا ده بيكون فوق قدرتنا على التحمل ماهو ماينفعش نكون من لا شئ إلى كل شئ....والنتيجه بتكون شويه يأس

والمشكله دي مش مشكلتي لوحدي أنا عارفه وشايفه انها مشكله ناس كتير من اللي أعرفهم

 المهم ان في كلمه لدكتور أحمد عماره غيرت شويه طريقه تفكيري في الجداول والمخططات اللي أنا بعملها,,,هو صحيح التخطيط حلو ومطلوب بس لازم يكون واقعي وقدرات النفس اللي بتستتقل أي فعل جديد وبتفضل تخليها في اللي هي عارفاه أحسن ,,عشان كده بنرجع تاني للي احنا عارفينه ومتعودين هليه اللي هو عدم فعل شئ!!

اللي قاله دكتور أحمد ان الانسان نفسيته بتميل للحاجه اللي بيعملها من فتره أو على الأقل عدى عليها 21 يوم وضرب مثال للشخص اللي مابيذاكرش أو مابيصليش فلما بييجي يذاكر أو يصلي بيحس بخنقه ....أو الشخص اللي بيشرب سجاير فبرضه بيحس بخنقه لما بيبطل يعمل الحاجه اللي هو متعود عليها

بس في ميزه خطيره هنا ,,,اننا لو قدرنا نواظب على حاجه لمده 21 يوم (على الأقل) بعد كده حنحس براحه واحنا بنعمل الحاجه دي وتبدأ تدخل في حاجه اسمها (دايره الارتياح ) وحنبدأ نحس بعدم راحه لما نبطلها

أول 7 أيام بيكونوا أصعب وقت لأن العقل بيكون لسه بيفكر في الفعل ومستتقله وبعدين تاني اسبوع بيحصل تحسن وتالت 7 أيام بيبدأ العقل يتبرمج على السلوك الجديد اللي عايز تنتظم عليه

بس في نقطه مهمه لازم ناخد بالنا منها هي ان العقل بيقاوم وبيرفض السلوكيات والحاجات الجديده لما بتحصل مره واحده,,,يعني اللي يقرر انه عايز يصلي كل الصلوات في المسجد وماكانش بيصلي في المسجد خالص ,,بيبدأ كويس أول كام يوم وبعدين بيمل و يبعد...

وعشان كده لازم تدرج أي سلوك جديد تدخله في حياتك وماتبدأش بأكتر من حاجه في نفس الوقت ..ففي المثال بتاع الصلاه في المسجد اختار صلاه واحده زي العصر مثلا وواظب عليها 21 يوم أو شهر أو أكتر لغايه ماتتأكد انك بتنزل تصليها وانت مرتاح ومش حاسس بعبء وابدأ دخل صلاه جديده او عاده جديده عايز تتعود عليها

يعني خلاصه الرغي ده ...المفروض ندرج الحاجات اللي عايزبن نواظب عليها واحده واحده ومانبدأش في حاجه جديده الا لما نتأكد اننا خلاص مستريحين ومش متضايقين واحنا بنعمل الحاجه دي وأقل وقت عشان نبدأ عاده جديده هو 21 يوم

طيب ايه علاقه الكلام ده بالتربيه؟؟

أولا أعتقد ان معظم الأمهات عندهم مشكله تنظيم الوقت خصوصا ان أعباء البيت والولاد بتاخد وقت وجهد والوقت اللي بيفضل عشان الأم تعمل الحاجات التانيه (المهمه برضه) زي العبادات أو القراءه أو الاعتناء بنفسها بيكون قليل وده بيوتر أعصاب أغلب الأمهات

انها مهما عملت بيفضل وراها حاجات لسه عايزه تتعمل وده بيخليها تمل

ثانيا اني لقيت إن أكبر معروف ممكن نعمله لولادنا هو إننا نعودهم من وهم صغيرين على إن يكون ليهم خطه وبرنامج يومي يمشوا عليه...وإننا نشيل من عليهم لما يكبروا عبء الانتظام على أولويات في الحياه لو كانوا اتعودوا عليها من صغرهم كانت حتوفر عليهم وقت وجهد كبير

وكمان فيه فوايد كتير لما الطفل بيتعود على روتين معين زي مثلا

1- إنه يتعود على سلوكيات النظافه الشخصيه زي غسيل السنان و غسل اليد بعد دخول الحمام,,أو بعض العادات الصحيه زي لعب الرياضه أو أكل الخضار والفاكهه

2-لما الطفل بيكون عنده عادات بيعملها يوميا وفي وقت معين ده بيحسسه بالأمان 

3-الروتين بيخلينا نفتكر إن الطفل لازم ياخد دواء معين ممكن في العادي ننساه

وده لينك فيه فوايد الروتين للصغار وللكبار كمانhttp://raisingchildren.net.au/articles/family_routines_how_and_why_they_work.html

في مواقع كتير عليها جداول للأطفال شكلها حلو وتشجعهم انهم يعلموا عليها أو يحطوا  ستيكركل ما ينفذوا حاجه من الجدول

http://www.freeprintablebehaviorcharts.com/daily%20routines.htm

http://www.rewardcharts4kids.com/chore-charts/free-chore-charts/

http://www.ichild.co.uk/tags/browse/134/Daily-Routines

بالنسبه لي أنا بدأت مع أحمد بغسيل السنان وركزت معاه على قبل النوم ,,وخليت غسيل السنان الصبح أركز عليه لما يبدأ يروح المدرسه (مااحنا قلنا واحده واحده) وبقى كل يوم يحط ستيكر وهو فرحان بانجازه وطبعا بالستيكر♥♥

busy bags

شنط الأنشطه

فكرتها الأساسيه انها شنطه بيتحط فيها مجموعه أدوات وخامات مختلفه حسب عمر الطفل عشان تسليه في الوقت اللي الأم مشغوله فيه ومش عايزه الطفل يضيع الوقت ده في الفرجه على التلفزيون,,أو في وقت الخروج أو السفر

الشنط دي الأم ممكن تبتكر في انها تحط فيها حاجات يتعمل بيها أنشطه مختلفه تشغل الطفل لفتره من الوقت زي قصص تلوين وكتب وورق واقلام وألوان وبازل وكرتون وأي شئ من ابتكارك ويكون مناسب لعمر طفلك وقدراته واهتماماته

بالنسبه لي أنا جربت شنطه الأنشطه بتاعه الخروج أو السفر,,وطبعا كل فتره لازم الأم تغير محتويات الشنطه عشان الطفل مايملش

وفكرتها كانت حلوه أوي ومفيده وفعلا بتسلي الطفل لفتره طويله من الوقت

طبعا محتويات الشنطه مش قاعده إطلاقا ولكن ممكن أقولكم بعض الأفكار اللي أنا جربتها 

-قصص تلوين تعليميه وألوان

-كراسه فاضيه وقلم

-ستيكر

-بازل

-بازل حروف

-كتب أو قصص

-كروت تعليميه

-عدسه مكبره

-شخصيه لعبه أو عروسه أو عربيات صغيره

لو الأطفال أكبر ممكن نحط في الشنط مقص ولزق وورق كرتون ..ويفضل استخدام كتب أو قصص أو حاجات تكون جديده على الطفل عشان يكون متشوق انه يستكشفها

من ضمن الافكار اللي عجبتني كمان للأطفال الأكبر هي شراء كاميرا مش غاليه وتكون مخصصه للطفل اللي بيحب التصوير

دي صور لأفكار مختلفه ممكن تساعدنا☺

http://www.themomviews.com/making-a-keep-busy-bag-for-toddlers/

ومن ضمن الاقتراحات كمان إن كل الأنشطه اللي جوه الشنطه تكون متحضره في البيت,,بس ده طبعا بيحتاج وقت أطول في التحضير

بس خدوا بالكم من الغلطه دي لأني وقعت فيها... أول مره أخدنا الشنطه معانا في رحله كنت حاطه فيها صلصال,,ولأن دودو لسه بيحتاج حد يلعب معاه بالصلصال لأنه لسه مش بيعرف يعمل بيه أشكال لوحده,,فكان كل ما يحب يفتح علبه الصلصال أقوله لأ مش دلوقتي ..كمان شويه (إيه السخافه دي!),, فلما فكرت اني أنا اللي حطهاله في الشنطه لقيت اني يا أسيبه يلعب بيها يا أشيلها من الشنطه أمال أنا كنت حطاها عشان أقوله لأ يا حبيبي ماينفعش تلعب بيها

يعني قصدي بلاش تاخدي في الشنطه حاجه مش مناسبه للطفل أو لسنه أو للمكان اللي حتكونوا فيه

وم

لعب تعليميه

 أسفه على فتره الانقطاع الطويله لكن رمضان وقته 

ضيق وربنا يتقبل منا جميعا ويثبتنا بعده

بما إن البلوج متعلق بكل ماله صله بتربيه الأولاد فأحب أحكيلكم عن تجربتي مع نوع من لعب الأطفال عجبني جدا وغير مفهومي عن نوع اللعب اللي المفروض نشتريها لولادنا

كنت بعمل سيرش في الأمازون واكتشفت بالصدفه الصفحه دي

http://www.amazon.co.uk/s/ref=nb_sb_ss_i_1_6?url=search-alias%3Dtoys&field-keywords=science+museum&sprefix=scienc%2Ctoys%2C282&rh=n%3A468292%2Ck%3Ascience+museum

وهي عباره عن لعب لماركه science museum وكلها لعب علميه يتعلم الطفل من خلالها ازاي يعمل robots تشتغل بالطاقه الشمسيه أو البطاريات,,,أو يعمل تجارب مبسطه لبعض الظواهر زي البراكين

ده الموقع

 http://www.sciencemuseumshop.co.uk/category/kids-gifts/robots.html

طبعا الفكره هبلتني وبعد البحث لقيت ماركه تانيه كمان اسمها thames and kosmos وده الموقع بتاعها

 http://www.thamesandkosmos.com/

ودي صفحتهم على الأمازون

http://www.amazon.co.uk/s/ref=nb_sb_ss_i_0_6?url=search-alias%3Dtoys&field

keywords=thames+%26+kosmos&sprefix=thames%2Ctoys%2C132&rh=n%3A468292%2Ck%3Athames+%26+kosmos

برضه فكرتها قائمه على التجارب,,, فمثلا لعبه العلوم بتكون العلبه مكونه من مجموعه كبيره من المكونات والأدوات وكتالوج فيه شرح للتجارب اللي الطفل يعملها وايه السبب العلمي لنتيجه التجربه 

لو فتحتوا كل لعبه في الأمازون بيكون في شرح للعبه ومكوناتها,,,,الميزه كمان ان الألعاب متدرجه حسب المراحل العمريه بس مافيش أصغر من 5 سنين

الألعاب متنوعه وشامله معظم أنواع العلوم زي الكيمياء والفيزياء وطاقه الرياح والطاقه الشمسيه وعلم النبات وتنقيه المياه والهندسه وإعاده التدوير(recycling ),,,الحفر والتنقيب عن الحفريات والفضاء وحاجات كتير كلهم أحلى من بعض بس معظم اللعب بتبدأ من سن 8

الحقيقه اللي شفته غير تفكيري في اللعب وحسيت ان فيه نوع تاني من اللعب متوائم أكتر مع العصر اللي احنا فيه ,,وخلاني أقرر اني أوقف شراء اللعب اللي مش مفيده و أبدأ أجيبله من دلوقتي اللعب دي بالرغم انه لسه أصغر من انه يستوعبها دلوقتي وأشيلهاله للمستقبل ان شاء الله

كنت خلاص قررت على عيد ميلاد أحمد أشتريله مجموعه من اللعب دي من الأمازون بس وانا بفكر ممكن ألاقيها فين هنا افتكرت محل بهجه العقول وكنت شفته في سيتي ستارز وهو محل بيبيع اللعب التعليميه ولما عملت سيرش لقيت الموقع بتاعهhttp://www.mindwinder.net/products.aspx

ولقيت انهم بيبيعوا بعض منتجات thames and kosmos وانهم بيعرضوا منتجاتهم في معرض planet shop اللي في مكتبه الاسكندريه عند الplanetarium وفعلا رحت ولقيت بعض المنتجات ولقيت كمان منتجات شركه k'nex اللي تشبه ال lego شويه

وعندهم كتب تعليميه رائعه للأطفال بالعربي والانجليزي وكتب للأطفال من national geographic اللي ماكنتش متخيله انها بتتباع هنا

معرفش ممكن نلاقي فين باقي اللعب اللي عرضتها لكن ممكن الحاجات اللي مانلاقيهاش هنا نشتريها من أمازون انجلترا لأن سعر شحنه أرخص من أمريكا (ده حسب تجربتي بس مش متأكده)

يااااااااريت يا أمهات نركز هدايا الولاد وعديتهم في لعب تشجع الطفل على الابتكار والتفكير والتجربه والمعرفه وفي نفس الوقت تكون فيها متعه اللعب

 

زينه رمضان

أهو جه يا ولاد

بما إن رمضان على الأبواب ,,,كل سنه وكل الأمهات طيبين,,,,,بدأنا نعلق النهارده الزينه والفوانيس عشان نحس بفرحه رمضان,,,وكنت عايزه أحمد يعمل زينه لرمضان بنفسه مش بس يشتريها,,,,ولقيت على اللينك ده http://kidsactivitiesblog.com/diy-bunting-from-kids-art/  طريقه سهله لعمل زينه تتعلق

☼الأدوات المطلوبه

1-ورق كرتون

2-ألوان شمع أو أي نوع حسب عمر الطفل

3-مقص

4-دباسه

5-خيط صوف أو شرايط ستان

وكل المطلوب من الطفل إنه يلون بشكل عشوائي أو منتظم على الكرتون,,,وده حسب عمر الطفل

(دودو عمل فن سيريالي ينافس بيه في المعارض الدوليه)

بعد ما يخلص الطفل تلوين يجي دور الأم الغلبانه,,,ولو الطفل كبير ممكن يكمل

أول حاجه تتني الكرتون من النصف,,,وبعدين تتنيه كمان تنيه,,,يعني يبقى مطبق على أربعه أجزاء متساويه,,,وبعدين تقصي مثلثات,,,أنا فضلت أخطط بالرصاص عشان تكون المثلثات متساويه إلى حد ما.

بعد كده تقصي المثلثات بالمقص,,,,حتلاقي في الأخر كميه كبيره من المثلثات ولو عايزه كميه أقل صغري حجم قطعه الكرتون أو كبري حجم المثلثات

 ....واسهل طريقه عشان تعلقيهم هو انك تدبسي المثلثات في أي نوع خيط أو شرايط طويله تكون عندك

ويارب يكون رمضان سعيد علينا جميعا إن شاء الله

حصالتي ليها كررش

الحصاله ,,,,فوفو

 بما إن أحمد قرب يكمل 4 سنين,,فحسيت انه بدأ يستوعب مفهوم

 الفلوس واننا بنستخدمها عشان نشتري بيها حاجات,,,بس عشان 

أطور الفكره أكتر قررت اني أجيبله حصاله وكل يوم نحطله فيها 

جنيه,,,ولما الحصاله تعمل دوشه جامده (يعني تتملي) حنطلع

 الفلوسويشتري بيها حاجه هو يختارها....وطبعا ده حيخليه يتعلم ان

الفلوس ليها قيمه وإنه ممكن يحب يشتري حاجه تكون أغلى من

 الفلوس اللي معاه وده حيخليه يحوش تاني لحد مايكمل

 المبلغ,,,وبكده يتعلم قيمه التحويش ويحس بفرحه لما يشتري

حاجه بفلوسه هو..♥

دودو اختار

الحصاله 

 على شكل

 فافا.....واسمها

 فوفو

فوفو وباني في

 سباق

فافا انضمت

 للسباق

 وطبعا باني هو

 اللي كسب

تجربه شبه ناجحه

أول تجارب اللعب الحسيsensory play 

كنت عماله افكر أبدأ بايه في اللعب الحسي لحد ما قررت أبدأ بمجموعه مختلفه من البقوليات والرز,,,لأنهم متوفرين وبيكونوا أشكال وألوان مختلفه ومش حيبهدلوا أوي (ده اللي توقعته)   

جهزت ملايه,, وعلبه حطيت فيها عدس وفاصوليا ورز ,,,,وحطيت   أطباق وعلب وملاعق وأدوات يلعب بيها ,,,,وجه دودو وشرحتله انه حيلعب بالحاجات دي في حدود الملايه وكان متحمس ومبسوط أوي,,,بس التجربه كانت على مرحلتين

أول مرحله ....كانت حلوه ومرحه ودودو كان مبسوط أوي وهو عمال يلعب بإيده وبالأدوات اللي حطيتهاله وينقل الحاجات من هنا لهنا وكله تمام

تاني مرحله .....بعد ماحسيت انه فهم اللعبه سيبته يلعب براحته....بعد شويه جه قاللي أنا خلصت لعب فاستغربت لأنه كان منهمك أوي وتوقعت انه حيطول عن كده,,,فدخلت أودته ولقيت ان العلبه اللي كنت حاطه فيها البقوليات فاضيه وكل الحاجه مدلوقه و مبدوره على السجاده  كلها,,,,,طبعا كل الشعارات اللي كنت بتكلم عنها اتبخرت وفضلت أزعق  وأمرته انه يلم اللي هو عمله ,,بس طبعا حيلم ايه ولا ايه,,واضطريت في الآخر اني ألم معاه بس كنت متغاظه ومش طايقه نفسي

حاولت أهدا تاني وفهمته ان حدوده هي الملايه مايطلعش براها..... نصيحتي لكل أم

☻ انك لازم تكوني واضحه  في تعليماتك وتشرفي كل شويه خصوصا أول مره

☻وكبري مساحه المفرش اللي حتحطيه تحت الطفل عشان يكون عنده مسافه أكبر للعب

بس عامه تقييمي للتجربه انها ناجحه جدا وأحمد كان مستمتع أوي وهو بيلعب أكتر من أي لعبه تانيه ,,وان شاء الله ححاول أتدارك الأخطاء المره الجايه

                                

يلا نزرع

زراعه الفاصوليا

أو زراعه البقوليات عامه سهله وبسيطه وبتدي نتيجه سريعه....كنت عايزه أوري دودو عملي ازاي البذره بتفتح وتطلع زرع

دورت مالقيتش عندي غير فاصوليا بيضه,,,ومع اني كنت شاكه انها حتطرح حاجه قلت اجرب الطريقه القديمه اللي كنا بنعملها مع الفول .....جبنا كلينيكس وقطن وبليناه و حطينا حبوب الفاصوليا وغطينا بكلينيكس مبلول وحطيناها قريب من الشباك عشان يدخلها إضاءه,,,,وطبعا دودو كل 5 دقايق يسألني (هاه طلعت زرع ولا لسه؟) 

الغريبه اني لقيت الفاصوليا كل يوم بتفتح وبيطلع لها جذور وبعدين ورق أخضر وخلال اسبوع ماشاء الله طلعت زرع

المهم دلوقتي اني عايزه انقلها لوعاء حلو وأحطها في طينه بس مش عارفه ينفع ولا لأ ...لأنها كونت جذور طويله ومش عارفه ممكن أنقلها ازاي,,,,فياريت لو حد عنده فكره مايبخلش بيها

الأولاد بيفرحوا لما بيشوفوا الحبوب اللي حطوها بإيديهم بتطلع زرع

الشيف دودو يقدم

بودنج مدود....يعععع

الأطفال بيحبوا يعكوا ...وطبعا أحلى عك هو الطبخ......قررت اني أجي على نفسي وأدخل دودو معايا المطبخ و أخليه يعمل حاجه بنفسه ويحس انه هو اللي طبخها وكلنا بناكل منها وعجبتني الوصفه من اللينك دهhttp://kidsactivitiesblog.com/easy-recipe-for-kids-dirt-cake/

وهي عباره عن بودنج بيتحط فوقه بسكوت أوريو مكسر و الحلويات اللي على شكل دود عشان يكون شكل الشتله

والطريقه سهله 

☺بنحط البسكوت في كيس تلاجه والطفل بيكسره بالنشابه عشان يدي احساس التربه

☻بنشتري الدود !

☺بنجهز البودنج وده ليه 3 مستويات من الصعوبه حسب عمر الطفل

1- أسهل طريقه نستخدم دانيت

2-أصعب شويه نشتري باكيتات البودينج سريع التحضير بيكون كل اللي على الطفل انه يفرغ محتويات الباكيت واللبن في وعاء...و الأم طبعا بترفعه على النار وتفرغه

3- أصعب طريقه أو أكثرهم في الخطوات اننا نحضر البودينج كاملا قي البيت

وبالنسبه لي أحلى وصفه بودنج جربتها في البيت كانت:

 4أكواب أو 1 لتر من الماء
1 علبة أو 397 غ من حليب نستله المكثف المحلى
4 ملاعق طعام من مسحوق الكاكاو
6 ملاعق طعام من دقيق الذرة

وطبعا بنرفعهم على النار لحد ما المزيج يتقل

أنا جربت مع أحمد أول طريقتين بس

وكل اللي عمله انه حط البودنج في طبق وبعدين البسكوت المكسر وبعدين الدود (او العكس) وممكن نضيف ورقه نعناع في النص...وبون أبيتي

يلا نلعب بكل كيانا

sensory play

ومعناه اللعب اللي بيستخدم فيه الطفل حاسه أو كتر من حواسه الخمسه,,,,يعني ببساطه العك بشياكه..إن الأم تشوف الطفل ملغوص نفسه وهدومه والأرض,,,,وتقوله هييييييه برافو عليك يا حبيبي !!!!

أحلى حاجه في اللعب ده إنه ينفع للأطفال من عمر سنه وما فوق,,,وطبعا كل أم أدرى باستيعاب طفلها وايه اللعب اللي ينفع معاه,,,وممكن تبدعي فيه زي ما تحبي على حسب عمر الطفل

كل اللي حتحتاجيه

1-هدوم يكون مصيرها للغسيل,,,,أو الزباله!!

2-مفرش كبير أو حصيره يسهل تنظيفها

3-أدوات مختلفه زي ملاعق وأطباق وأكواب وعلب بلاستيك 

4-المكون اللي حتسيبي الطفل يلغوص فيه ,,,وده بيختلف حسب عمر الطفل

طبعا كل ما صغر السن كل ماكانت المكونات اللي حتستخدميهالازم تكون قابله للأكل مثل:

♥جيلي ياريت يكون أكتر من لون وممكن يتحط في قوالب أشكال

♥بودينج ممكن أكتر من لون وطعم

♥m&m's

♥كورن فليكس

♥كريم شانتيه مضروب وممكن تستخدمي عليه ألوان طبيعيه

♥مكرونه مسلوقه بالزيت أشكال مختلفه

♥خضار أو فاكهه متقطعين 

♥زبادي

♥مياه

وطبعا الخيارات كتير وممكن تبتكري براحتك ,,,والميزه هنا ان ممكن الطفل ياكل براحته اللي هو بيلعب بيه وتبقي ضربتي عصفورين بحجر

ممكن الأطفال الأكبر سنا يلعبوا بحاجات تانيه زي

♥رمله

♥بقوليات مختلفه زي فشار وعدس وفول

♥زلط من أشكال وأحجام مختلفه

♥خرز ألوان

♥صدف

☼الميزه في النوع ده من اللعب ان الطفل بيعلم نفسه بنفسه عن طريق الاستكشاف والملاحظه والتصنيف على حسب اللون أو الشكل او الحجم وبيستخدم حواسه كلها لاكتشاف الماده اللي بيلعب بيها وده بيطور من قدراته وبيزود حصيله كلماته

♫♫تحذير للأمهات 

خلي وقت اللعب ده حر يتصرف فيه الطفل زي ما يحب طالما جوه حدود المكان اللي انتي محدداه وبلاش تفقدي أعصابك لما تشوفي الفنان التشكيلي اللي جوه ابنك,,,,ممكن تخلي دورك بس انك توجهي الطفل انه يصنف الأشياء حسب لونها أو حجمها أو شكلها ,,,ولو أعصابك ماتحملتش روحي شوفي حاجه تانيه تعمليها أو خدي قرص مهدئ☺

أنا لسه ماجربتش الطريقه دي مع أحمد,,,حجربها النهارده إن شاء الله ,,,وربنا يصبرني!!